საპარლამენტო უმრავლესობის წევრი ზურაბ ტყემალაძე პრეზიდენტის არჩევის წესთან დაკავშირებით რეფერენდუმის ჩატარებას გამორიცხავს.

"ამ საკითხზე რეფერენდუმის ჩატარება გამორიცხულია, მოგეხსენებათ რეფერენდუმი ქვეყნის მთელ ტერიტორიაზე უნდა ჩატარდეს, საქართველოს ტერიტორიების 20% კი ოკუპირებულია. ალბათ, უფრო პლებისციტი შეიძლება, გაიმართოს, თუმცა პლებისციტის შედეგებს ნაკლები იურიდილი ძალა აქვს", - განაცხადა ტყემალაძემ.

მისივე თქმით, პლებისციტის ჩატარების შემთხვევაში მოსახლეობას მკაფიოდ უნდა განემარტოს, თუ რას გულისხმობს პრეზიდენტის პირდაპირი და ირიბი გზით არჩევა.

წყარო: www.pirweli.com.ge

კომუნიკაციების მარეგულირებელი კომისიის საქმიანობით შესაძლოა პარლამენტი - დროებით საგამოძიებო კომისიის ფორმატში დაინტერესდეს.

ამის შესახებ ჟურნალისტებს დარგობრივი ეკონომიკისა და ეკონომიკური პოლიტიკის კომიტეტის ხელმძღვანელმა, ზურაბ ტყემელაძემ განუცხადა.

მისი თქმით, კომიტეტის სხდომაზე, შპს "ახალი ქსელების", "ახტელის" და "სისტემ ნეტის" განცხადება განიხილეს, სადაც შპს-ის წარმომადგენელმა, ხათუნა ინჯიამ კომუნიკაციის მარეგულირებელ სფეროში არსებულ საკანონმდებლო ხარვეზებსა და ეროვნული კომუნიკაციების კომისიის წევრების მხრიდან მთელ რიგ დარღვევებზე გაამახვილა ყურადღება.

ინჯიას მიიჩნევს, რომ აუცილებელია ცვლილებები "ელექტრონული კომუნიკაციების შესახებ" კანონში, ასევე ეროვნული კომუნიკაციების კომისიის წევრთა მხრიდან დოკუმენტების გაყალბებისა და სამსახურებრივი უფლებამოსილების ბოროტად გამოყენების არსებობა-არარსებობის დადგენის მიზნით, მოკვლეული მასალების პროკურატურისთვის გადაცემა და ინტერსეთა კონფლიქტის არსებობის გამო, კომისიის წევრთა თანამდებობიდან გათავისუფლება.

წყარო: www.iveroni.com.ge

ზურაბ ტყემალაძე ,,ნაციონალურ მოძრაობას" ცრუ ინფორმაციის გავრცელებაში ადანაშაულებს და აცხადებს, რომ უმცირესობის წევრები ტყუიან როდესაც მათ მიმართ ზეწოლაზე საუბრობენ.

,,ვისზე მიდის ზეწოლა გამოვიდეს და თქვას. რა ზეწოლაზე საუბრობთ დაასაბუთეთ. ეს თქვენ ხელისუფლებაში ყოფნის დროს ხოლციელდებოდა ადამანების მიმართ შანტაჟი, დევნა და ზეწოლა. მახსოვს ჩემი პირადი მძღოლი თქვენს პორკურატურაში რამდენიმე საათი იკითხებოდა მხოლოდ იმიტომ, რომ ის ჩემთან მუშაობდა. ნუ სპეკულირებთ ამ თემით", განაცხადა სიტყვით გამოსვლისას უმრავლესობის წევრმა ზურაბ ტყემალაძემ

http://www.iveroni.com.ge

რატომ შეექმნათ ფინანსური პრობლემები ძველი ხელისუფლების წარმომადგენლებთან ასოცირებულ კომპანიებს? როგორც ვიუწყებოდით, მუშაობა შეაჩერეს ამიერკავკასიაში ჰიგიენური საშუალებების ერთადერთმა მწარმოებლებმა „ბერტამ“, ხოლო „ბარამბოს“ ქონება დაყადაღდა.

ინფრასტრუქტურული პროექტების ერთ-ერთ ყველაზე მსხვილ განმახორციელებელ “ნიუ-ენერჯის” საქმეს კი ფინანსთა სამინისტროს საგამოძიებო სამსახური სწავლობს. დარგობრივი ეკონომიკის საპარლამენტო კომიტეტის თავმჯდომარე რადიო „კომერსანტთან“ განმარტავს, რომ პრობლემების მიზეზი თითოეულ შემთხვევაში კონკრეტულია. თუმცა, ზურაბ ტყემალაძე გამორიცხავს, რომ კომპანიებს პრობლემები ხელოვნურად პოლიტიკური ნიშნით შექმნოდათ.

მისი თქმით, თუ რომელიმე კომპანია საგადასახადო შემოწმების კანონიერ პროცესს ვერ უძლებს და ბიზნესს ხურავს, ეს მენეჯმენტის და ორგანიზაციის პრობლემაა.

ტყემალაძის მტკიცებით, გამორიცხულია სახელმწიფო ტენდერების ფარგლებში პროტექციონიზმის ფაქტები და თუ ეს კომპანიები 2012 წლის ოქტომბრამდე კონკურსის პირობებში პრივილეგირებულ მდგომარეობაში იყვნენ და ამჟამად თავისუფალი კონკურენციის პირობებში სატენდერო წანადადების მოგება გაურთულდათ, ესეც მათი პრობლემაა.

საპარლამენტო უმცირესობის ერთერთი ლიდერი გიორგი ვაშაძე კი აცხადებს, რომ ამ კომპანიების დახურვით 3000 ადამიანი დარჩება სამსახურის გარეშე, რითიც დეპუტატის თქმით, ბიუჯეტს მოაკლდება სოლიდური შენატანი. ვაშაძის განცხადებითვე, აღნიშნული პროცესების ფონზე ინვესტორები მოერიდებიან საქართველოში ფულის ჩადებას და საბოლოოო ჯამში არსებული სამუშაო ადგილების შემცირებასთან ერთად ახლის შექმნაც შეუძლებელი გახდება. უმცირესობის წევრის განცხადებითვე, პოლიტიკური ხაზით მსგავსი პროცესების გატარებამ დღეს ქვეყნის ეკონომიკა რთულ მდგომარეობაში ჩააყენა.

წყარო: www.commersant.ge

– სჭირდება თუ არა ქართულ ბიზნესს და ეკონომიკას ქვეყანაში ეკონომიკური ამნისტიის გამოცხადება და ეკონომიკური დანაშაულის დეკრიმინალიზაცია?

– ძალიან სამწუხაროა, მე რომ უნდა ვილაპარაკო ამნისტიის წინააღმდეგ, მაგრამ სამწუხაროდ, ჩვენი პრეზიდენტის უაზრო გადაწყვეტილებებმა დაგვღალა.დაუშვებელია, რომ ეს კანონი მივიღოთ. ვიღაცა იხდის და ვიღაცას უნდა ვაპატიოთ, ეს უკვე დისბალანსს ქმნის. ანუ ჩვენ ვაძლევთ სტიმულს არგადამხდელებს, რომ არ გადაიხადონ, რადგან ოდესღაც ვიღაც აპატიებს. არ არის სწორი. მით უფრო ამის წინასწარ განცხადება დანაშაულია. ესე იგი ჩვენ ვეუბნებით: ნუ გადაიხდი! მთელი 15 წელი ვიბრძვი ამ გადასახადების წინააღმდეგ, იმდენად მიუღებელია ჩვენი საგადასახადო კოდექსი. თუმცა ახლა იძულებული ვარ ვთქვა, რომ არასწორი და დაუშვებელია. ეს ჩვენი პრეზიდენტის მორიგი დაუფიქრებელი, გაუაზრებელი განცხადებაა. მე ძალიან მიჭირს ამაზე საუბარი, სულ ვლაპარაკობ, რომ გადასახადები უნდა შემცირდეს, რომ არასწორი საგადასახადო კოდექსია, ძალიან ბევრი ცოდვებია ამ კოდექსში, მაგრამ ახლა იძულებული ვარ ასეთი პოზიცია დავაფიქსირო.

– თუმცა ბიზნესი სწორად გაიგებს ახალი ხელისუფლების ამ დამოკიდებულებას?

– ეს კანონი გათვლილია იმაზე, ვინც ნომენკლატურული ბიზნესის წარმომადგენელი იყო.

– მაგალითად ვისზე?

– რატომ აპატიეს „რუსთავი 2–ს“, „პირველ არხს“ მილიონობით გადაუხდელობა. ეს ეშმაკობაა. ნებისმიერი ფორმის ბიზნესი გადასახადს უნდა იხდიდეს. დღეს პრეზიდენტს უნდა, რომ ვიღაცეებს აპატიოს. ჩვენ, არანომენკლატურულ ბიზნესმენებს არავინ არაფერს გვპატიობდა. ეს არის ძალიან გაუთვლელი და არასწორი პოლიტიკური ნაბიჯი. მოდით მოვთხოვოთ ყველას, გადასახადი გადაიხადოს, მაგრამ ისიც უნდა შეპირდე, რომ გადასახადი იქნება ობიექტური და გადაიხედება საგადასახადო კოდექსი. ყველა ქართველ ბიზნესმენს გული სტკივა, რომ საქართველო ამ დღეშია, რომ ბევრი პრობლემაა, რომ პენსიები არ არის. ყველაფერს გავაკეთებთ, ოღონდ მივაღწიოთ იმას, რომ საგადასახადო კოდექსი იყოს მორგებული, ნორმალური და ყოველგვარი ავანტურული გადაწყვეტილებების გარეშე. მიუღებელია, რაც რამდენიმე დღის წინ პრეზიდენტმა განაცხადა.

– თუმცა, როდესაც საუბარია ეკონომიკური დანაშაულის დეკრიმინალიზაციაზე, რამდენად სწორია, როდესაც იმის გამო, რომ ადამიანი გადასახადს არ იხდის, ის ხვდება ავტომატურად ციხეში? ამ მიმართულებით მაინც თუ არის პრეზიდენტის ინიციატივა მისაღები?

– გადასახადების დეკრიმინალიზაცია ვის ეხება? დამისახელეთ ერთი არანომენკლატურული ბიზნესის წარმომადგენელი, ვინც ამ გადასახადებს გადაურჩა. ეს გათვლილია იმათზე, რომელიც წეღან გიხსენეთ – „რუსთავი 2“, „პირველი არხი“, ვინც მილიონობით ლარი არ გადაიხადა. ეს ყველაფერი იმათ სასარგებლოდ კეთდება და არა ნორმალური, პატიოსანი ბიზნესმენისთვის. ჩვენ ყველაფერი გადაგვახდევინეს, ორმაგი, სამმაგი ოდენობით დაგვაწერეს. ამიტომ ეს ყველაფერი ჩვენთვის მიუღებელია. დამერწმუნეთ, ასეთი გადაწყვეტილებები მომავალში ძალიან ძვირი დაუჯდება ჩვენს ბიუჯეტს. არ შეიძლება, უნდა გადავიხადოთ ის, რაც გადასახდელი იქნება, რასაც კანონი დაგვიწესებს, ოღონდ ეს უნდა იყოს ძალიან ობიექტური გადასახადი და არა ისეთი, როგორც აქამდე იყო.

– როგორ უნდა მიიღოს ბიზნესმა სარგებელი ახალი ხელისუფლების პირობებში, რა ღონისძიებები და ნაბიჯები გადაიდგმება ახალი მთავრობის მხრიდან ისეთი, რაც ბიზნესს მათ უკეთეს პირობებში ამყოფებს?

– თებერვალში ძალიან ბევრი, უფრო მნიშვნელოვანი კანონებია მისაღები (პოლიტიკური გადაწყვეტილებები). ამის შემდეგ ჩვენ მივდგებით და დავიწყებთ ეკონომიკური პრობლემების გადაწყვეტას. ანუ მივადგებით საგადასახადო კოდექსს, რომელიც დღეს მიუღებელია. ეს ალბათ დაიწყება გაზაფხულიდან, როგორც კი პოლიტიკური სიტუაცია დალაგდება. ჩვენ რა თქმა უნდა ბევრ რამეს შევცვლით. თუ ჩვენ გვინდა, რომ საქართველოში განვითარდეს სოფლის მეურნეობა, მრეწველობა, ეკონომიკა საერთოდ, ჩვენ უნდა მივიღოთ ის კანონები, რომლებიც წაადგება ქართულ მრეწველობას, ქართულ სოფლის მეურნეობას და არა ის კანონები, რომლებიც იმპორტიორებს გაახარებს საქართველოში.

წყარო: www.commersant.ge

თბილისში, პარლამენტის შენობის რეაბილიტაციისთვის 8-10 მილიონი ლარის დახარჯვა იგეგმება, - ამის შესახებ "ინტერპრესნიუსს" დარგობრივი ეკონომიკისა და ეკონომიკური პოლიტიკის საპარლამენტო კომიტეტის ხელმძღვანელმა ზურაბ ტყემალაძემ განუცხადა.


მისი თქმით, ეს თანხაა განსაზღვრული რუსთაველის გამზირზე მდებარე შენობის მოსაწესრიგებლად, ჯამში როგორც 2012 წლის, ასევე მომავალი წლის ბიუჯეტებიდან.


როგორც დეპუტატმა აღნიშნა, პარლამენტის ძველი შენობის აღდგენა-რეაბილიტაციისთვის აქტიური მზადება მიმდინარეობს.


"დაწყებულია საპროექტო სამუშაოები. ჩემი მონაცემებით, გამოცხადებული უნდა იყოს ტენდერი და რისი გაკეთებაც წლის ბოლომდე მოესწრება, იმის მიხედვით მოხდება თანხების ათვისება" ,- აცხადებს ტყემალაძე.


პარლამენტის ძველი შენობა საკანონმდებლო ორგანოს უკვე დაუბრუნდა. მისი მოწესრიგებისთვის თანხები 2012 წლის სახელმწიფო ბიუჯეტიდანაც გამოიყოფა 2 მილიონი ლარის ოდენობით.


წყარო/Source: "ინტერპრესნიუსი"

პარლამენტის პლენარულ სხდომაზე დარგობრივი ეკონომიკისა და ეკონომიკური პოლიტიკის კომიტეტის თავმჯდომარე ზურაბ ტყემალაძემ საგადასახადო კოდექსში ცვლილებების შეტანის შესახებ კანონპროექტის გადადება მოითხოვა. ამის მიზეზად მან დაასახელა ის, რომ კომიტეტს კანონპროექტის ყველა მუხლი არ განუხილავს.

ტყემალაძე შემოვიდა წინადადებით, რომ პარლამენტმა პირველი მოსმენით განიხილოს კანონპროექტის ის მუხლები, რომლებზეც კომიტეტეს დასკვნა უკვე აქვს დადებული.

ტყემალაძის მოთხოვნას არ დაეთანხმა საფინანსო-საბიუჯეტო კომიტეტის თავმჯდომარე დავით ონოფრიშვილი. მისი განცხადებით, კანონპროექტი ყველა კომიტეტში უკვე განიხილეს და საკითხი პლენარულ სხდომაზე გასატანად მზად არის.

პარლამენტის თავმჯდომარე დავით უსუფაშვილმა, კომიტეტებს შესთავაზა შესვენებაზე იმსჯელონ იმ მუხლების გატანის შესახებ, რომლებიც დარგობრივი ეკონომიკისა და ეკონომიკური პოლიტიკის კომიტეტს არ განუხილავს.

წყარო: news.ge

ბაზარზე გენმოდიფიცილებული პროდუქციის დაშვებასთან დაკავშირებით გარკვეული წესების, შეზღუდვებისა და აკრძალვების ამოქმედების საკითხი ახალი პარლამენტის დღის წესრიგშიც დგება.
პარლამენტის დარგობრივი ეკონომიკისა და ეკონომიკური პოლიტიკის კომიტეტი მთავრობას ამ მიმართულებით კანონის მომზადების მოთხოვნით მიმართავს.
როგორც კომიტეტის ხელმძღვანელი ზურაბ ტყემალაძე აცხადებს, საზოგადოებამ უნდა იცოდეს, თუ რა ტიპის პროდუქტს ყიდულობს - ეკოლოგიურად სუფთას თუ გენმოდიფიცირებულს.
”ხალხმა უნდა იცოდეს, რას ჭამს და სვამს, არჩევანი კი, თავად უნდა გააკეთოს. მიუღებელია პოზიცია იმის შესახებ, თითქოს გენმოდიფიცირებული პროდუქტის აკრძალვა ფასებს გააძვირებს. გენმოდიფიცირებულ საკვებთან დაკავშირებული საკითხები ბიუჯეტის თანმდევ კანონებში უნდა იყოს ასახული. არ შეიძლება რაღაცაზე ზოგადად ვსაუბრობდეთ და ის საკანონმდებლო დონეზე არ იყოს ასახული”, - აცხადებს ზურაბ ტყემალაძემ.

წყარო: www.interpressnews.ge

დარგობრივი ეკონომიკისა და ეკონომიკური პოლიტიკის ხელმძღვანელი ზურაბ ტყემალაძე ე.წ. დაუბეგრავი მინიმუმის ამოქმედებასთან დაკავშირებით მთავრობის მხრიდან გართულებული მექანიზმების ამოქმედების გეგმაზე საუბრობს და ფინანსთა სამინისტროს ამ მიმართულებით მოქნილი პრინციპის შემოღების მოთხოვნით მიმართავს.
ამ საკითხზე დებატები კომიტეტის სხდომაზე გაიმართა, სადაც დეპუტატებმა 2013 წლის საბიუჯეტო პროექტის პარამეტრები განიხილეს.
როგორც ცნობილია, დაუბეგრავი მინიმუმის შემოღება ”ქართული ოცნების” წინასაარჩევნო დაპირებების შემადგენელ ნაწილს წარმოადგენს, რომელიც სამომხმარებლო კალათასთან მიმართებაში უნდა იყოს დაანგარიშებული.
ტყემალაძის თქმით, ბიუჯეტის თანმდევი კანონის თანახმად, რომელიც პარლამენტში მომავალი კვირისთვის შევა, აღნიშნულია, რომ გადახდილი თანხა მოქალაქეს მომავალი წლის ბოლოს დაუბრუნდება უკან, ანუ შედგება წლიური დეკლარაცია, თუ რამდენი აქვს გადახდილი საშემოსავლოსი.
”ამ მიმართულებით უფრო მოქნილი მექანიზმი უნდა ამოქმედდეს და ჩვენ ამ მექანიზმებზე უნდა შევთანხდეთ”, - აცხადებს ტყემალაძე.

წყარო: www.interpressnews.ge

კოალიცია „ქართული ოცნების“ წევრ გოგი თოფაძის თქმით, ქუთაისის პარლამენტში მუშაობა შეუძლებელია.


„ქუთაისში იყვნენ ჩვენი წარმომადგენლები. არ არის მზად პარლამენტის შენობა და პრობლემა გაჩნდა. ალბათ დღეს გადავწყვეტთ როგორ მოვიქცეთ. იქ მუშაობა პრაქტიკულად შეუძელებლია“, - განაცხადა გოგი თოფაძემ.


როგორც თოფაძე აღნიშნავს პრობლემების მიუხედავად, ახალი პარლამენტის პირველი სხდომა არ გადაიდება.


პარლამენტის ახალი შენობის გაუმართაობაზე საუბრობდა კოალიციის კიდევ ერთი წევრი ლევან ბერძენიშვილი.


მისი თქმით, ქართული ოცნება“ კონსტიტუციას არ დაარღვევს და პარლამენტის პირველ სხდომას ქუთაისში გახსნის, თუმცა, არ არის აუცილებელი ეს კონკრეტულად ქუთაისის პარლამენტში მოხდეს, რადგანაც ამას კონსტიტუცია არ ითვალისწინებს.


ქუთაისი პარლამენტის შენობის მდგომარეობის შესასწავლად „ქართული ოცნების“ ექსპერტთა ჯგუფი გუშინ გაემგზავრა. ახალი მოწვევის პარლამენტის ეკონომიკური განვითარების კომიტეტის თავმჯდომარეობის კანდიდატის ნოდარ ხადურის განცხადებით, ქუთაისის პარლამენტში მუშაობა სახიფათო და წარმოუდგენელია.


როგორც News.ge-ს ნოდარ ხადურმა განუცხადა, კონსტიტუციის შესაბამისად, პარლამენტი ქუთაისში უნდა შეიკრიბოს, რის დარღვევასაც „ქართული ოცნება“ არ აპირებს.

წყარო: News.ge